گاتے ہوئے پیڑوں کی خنک چھاؤں سے آگے نکل آئے

گاتے ہوئے پیڑوں کی خنک چھاؤں سے آگے نکل آئے

ہم دھوپ میں جلنے کو ترے گاؤں سے آگے نکل آئے

ایسا بھی تو ممکن ہے ملے بے طلب اک مژدۂ منزل

ہم اپنی دعاؤں سے تمناؤں سے آگے نکل آئے

کہتے ہیں کہ جسموں کو اک روح مقدس کی دعا ہے

وہ جسم کہ جو اپنے تھکے پاؤں سے آگے نکل آئے

تھوڑا سا بھی جن لوگوں کو عرفان مذاہب تھا وہ بچ کر

کعبوں سے شوالوں سے کلیساؤں سے آگے نکل آئے

تھے ہم بھی گنہ گار پر اک زاہد مکار کی ضد

بازار میں بکتی ہوئی سلماؤں سے آگے نکل آئے

شہروں کے مکینوں سے ملی جب ہمیں وحشت کی ضمانت

ہم سی کے گریبانوں کو صحراؤں سے آگے نکل آئے

بنتی رہی اک دنیا قتیلؔ اپنی خریدار مگر ہم

یوسف نہ بنے اور زلیخاؤں سے آگے نکل آئے

gate hue peron ki khunuk chhaon se age nikal ae

ham dhup mein jalne ko tire gaon se age nikal ae

aisa bhi to mumkin hai mile be talab ik muzhda-e-manzil

ham apni duaon se tamannaon se age nikal ae

kahte hain ke jismon ko ik ruh muqaddas ki dua hai

wo jism ke jo apne thake paon se age nikal ae

thora sa bhi jin logon ko irfan-e-mazahib tha wo bach kar

kaabon se shawwalon se kalisaon se age nikal ae

the ham bhi gunah gar par ik zahid makkar ki zid

bazar mein bikti hui salmaon se age nikal ae

shahron ke makinon se mili jab hamen wahshat ki zamanat

ham si ke garebanon ko sahraon se age nikal ae

banti rahi ik duniya qatil apni kharidar magar ham

yusuf na bane aur zulekhaon se age nikal ae