گریباں در گریباں نکتہ آرائی بھی ہوتی ہے

گریباں در گریباں نکتہ آرائی بھی ہوتی ہے

بہار آئے تو دیوانوں کی رسوائی بھی ہوتی ہے

ہم ان کی بزم تک جا ہی پہنچتے ہیں کسی صورت

اگرچہ راہ میں دیوار تنہائی بھی ہوتی ہے

بکھرتی ہے وہی اکثر خزاں پرور بہاروں میں

چمن میں جو کلی پہلے سے مرجھائی بھی ہوتی ہے

بنام کفر و ایماں بے مروت ہیں جہاں دونوں

وہاں شیخ و برہمن کی شناسائی بھی ہوتی ہے

چمکتی ہے کوئی بجلی تو شمع رہ گزر بن کر

نگاہ برہم ان کی کچھ تو شرمائی بھی ہوتی ہے

قتیلؔ اس دم بھی رہتا ہے یہی احساس محرومی

جب ان شانوں پہ زلفوں کی گھٹا چھائی بھی ہوتی ہے

gareban dar gareban nukta arai bhi hoti hai

bahar ae to diwanon ki ruswai bhi hoti hai

ham un ki bazm tak ja hi pahunchte hain kisi surat

agarche rah mein diwar-e-tanhai bhi hoti hai

bikharti hai wahi aksar khizan parwar baharon mein

chaman mein jo kali pahle se murjhai bhi hoti hai

banam-e-kufr-o-iman be murawwat hain jahan donon

wahan shaikh-o-barahman ki shanasai bhi hoti hai

chamakti hai koi bijli to sham-e-rah guzar ban kar

nigah-e-barham un ki kuchh to sharmai bhi hoti hai

qatil is dam bhi rahta hai yahi ehsas-e-mahrumi

jab in shanon pe zulfon ki ghata chhai bhi hoti hai