ستم کے بعد کرم کی ادا بھی خوب رہی

ستم کے بعد کرم کی ادا بھی خوب رہی

جفا تو خیر جفا تھی وفا بھی خوب رہی

بہ فیض گردش دوراں انہیں بھی پیار آیا

بہ پاس مصلحت ان کی رضا بھی خوب رہی

بصد خلوص قناعت کی داد ملتی ہے

گدا نوازیٔ اہل سخا بھی خوب رہی

لگی ہے مہر مقدر کی دانے دانے پر

یہ خوش مذاقیٔ شان خدا بھی خوب رہی

کہیں شکم کے تقاضے نظر نہیں آتے

چراغ دیر و حرم کی ضیا بھی خوب رہی

ہمارے ہاتھ سے آتی ہے بوئے پیراہن

ہمارے حسن طلب کی ادا بھی خوب رہی

sitam ke baad karam ki ada bhi khub rahi

jafa to khair jafa thi wafa bhi khub rahi

ba faiz-e-gardish-e-dauran unhen bhi pyar aya

ba pas maslahat un ki raza bhi khub rahi

basad khulus-e-qanaat ki dad milti hai

gada nawazi-e-ahl-e-sakha bhi khub rahi

lagi hai mehr muqaddar ki dane dane par

ye khush mazaqi-e-shan-e-khuda bhi khub rahi

kahin shikam ke taqaze nazar nahin ate

charagh-e-dair-o-haram ki ziya bhi khub rahi

hamare hath se ati hai bu-e-pairahan

hamare husn-e-talab ki ada bhi khub rahi