خیال جبہ و دستار بھی نہیں باقی

خیال جبہ و دستار بھی نہیں باقی

وہ کشمکش ہے کہ اک تار بھی نہیں باقی

چمن کو روند گئے قافلے بہاروں کے

گلوں کا ذکر ہی کیا خار بھی نہیں باقی

لگی ہوئی ہیں ضمیر حیات پر مہریں

کسی میں جرأت اظہار بھی نہیں باقی

کبھی کبھی جو رگ جاں سے پھوٹ پڑتا ہے

وہ نغمۂ رسن و دار بھی نہیں باقی

ہمیں تو کفر کا طعنہ دیا تھا واعظ نے

حرم میں اب کوئی دیں دار بھی نہیں باقی

لٹا جو اپنا گلستاں تو ہم نے یہ سمجھا

کوئی بہشت افق پار بھی نہیں باقی

گزر گئے وہ سخن فہمیوں کے ہنگامے

کوئی کسی کا طرفدار بھی نہیں باقی

khayal jubba-o-dastar bhi nahin baqi

wo kashmakash hai ke ik tar bhi nahin baqi

chaman ko raund gae qafile baharon ke

gulon ka zikr hi kya khar bhi nahin baqi

lagi hui hain zamir-e-hayat par mehren

kisi mein jurat-e-izhar bhi nahin baqi

kabhi kabhi jo rag-e-jan se phut parta hai

wo naghma-e-rasan-o-dar bhi nahin baqi

hamen to kufr ka taana diya tha waiz ne

haram mein ab koi den dar bhi nahin baqi

luta jo apna gulistan to ham ne ye samjha

koi bahisht ufuq par bhi nahin baqi

guzar gae wo sukhan fahmiyon ke hangame

koi kisi ka tarfdar bhi nahin baqi