حادثے پھیل گئے سایۂ مژگاں کی طرح

حادثے پھیل گئے سایۂ مژگاں کی طرح

غم دوراں بھی ملا ہے غم جاناں کی طرح

لاکھ پیوند امیدوں نے لگا رکھے ہیں

دل کی صورت نظر آتی ہے گریباں کی طرح

کوئی افلاک نشیں ہے تو پکارے مجھ کو

حسرتیں خاک بسر ہیں مری طوفاں کی طرح

اور ہوں گے وہ میسر ہے جنہیں لطف بہار

ہم تو گلشن میں بھی رہتے ہیں بیاباں کی طرح

جو بھی گل ہے یہاں فردوس بنا بیٹھا ہے

کون کھلتا ہے یہاں غنچۂ عصیاں کی طرح

یہ بھی اعجاز کہیں باد مخالف کا نہ ہو

دل اڑا جاتا ہے اورنگ سلیماں کی طرح

خوف محشر سے نہ گھبراؤ تم اے بادہ کشو

در توبہ بھی کھلا ہے در زنداں کی طرح

ہم کیا کرتے ہیں اشکوں سے تواضع کیا کیا

جب خیالوں میں وہ آ جاتے ہیں مہماں کی طرح

نہ کوئی ساز نہ سنگیت نہ پازیب نہ گیت

اف یہ ماحول کہ ہے شہر خموشاں کی طرح

ہم ترے مصر میں آئے ہیں زلیخائے شکم

بک نہ جائیں کہیں ہم یوسف کنعاں کی طرح

hadse phail gae saya-e-mizhgan ki tarah

gham-e-dauran bhi mila hai gham janan ki tarah

lakh paiwand ummidon ne laga rakhe hain

dil ki surat nazar ati hai gareban ki tarah

koi aflak nashin hai to pukare mujh ko

hasraten khak basar hain miri tufan ki tarah

aur honge wo muyassar hai jinhen lutf-e-bahar

ham to gulshan mein bhi rahte hain bayaban ki tarah

jo bhi gul hai yahan firdaus bana baitha hai

kaun khulta hai yahan ghuncha-e-isyan ki tarah

ye bhi ejaz kahin bad-e-mukhalif ka na ho

dil ura jata hai aurang-e-sulaiman ki tarah

khauf-e-mahshar se na ghabrao tum ai bada kasho

dar-e-tauba bhi khula hai dar-e-zindan ki tarah

ham kiya karte hain ashkon se tawazo kya kiya

jab khayalon mein wo a jate hain mehman ki tarah

na koi saz na sangit na pazeb na git

uf ye mahaul ke hai shahr-e-khamoshan ki tarah

ham tire misr mein ae hain zulekha-e-shikam

bik na jaen kahin ham yusuf-e-kanan ki tarah