زندگی کے غم لاکھوں اور چشم نم تنہا

زندگی کے غم لاکھوں اور چشم نم تنہا

حسرتوں کی میت پر رو رہے ہیں ہم تنہا

مل سکا نہ کوئی بھی ہم سفر زمانے میں

کاٹتے رہے برسوں جادۂ الم تنہا

کھیل تو نہیں یارو راستے کی تنہائی

کوئی ہم کو دکھلائے چل کے دو قدم تنہا

دل کو چھیڑتی ہوگی یاد رفتگاں اکثر

لاکھ جی کو بہلائیں شیخ محترم تنہا

مسجدیں ترستی ہیں اس طرف اذانوں کو

اس طرف شوالوں میں رہ گئے صنم تنہا

اس بھری خدائی میں وہ بھی آج اکیلے ہیں

خلوتوں میں رہ کر بھی جو رہے تھے کم تنہا

تھی قتیلؔ چاہت میں ان کی بھی رضا شامل

پھر بھی ہم ہی ٹھہرے ہیں مورد ستم تنہا

zindagi ke gham lakhon aur chashm-e-nam tanha

hasraton ki mayyat par ro rahe hain ham tanha

mil saka na koi bhi ham safar zamane mein

katte rahe barson jada-e-alam tanha

khel to nahin yaro raste ki tanhai

koi ham ko dikhlae chal ke do qadam tanha

dil ko chherti hogi yad-e-raftagan aksar

lakh ji ko bahlaen shaikh mohtaram tanha

masjiden tarasti hain is taraf azanon ko

is taraf shawwalon mein rah gae sanam tanha

is bhari khudai mein wo bhi aj akele hain

khalwaton mein rah kar bhi jo rahe the kam tanha

thi qatil chahat mein un ki bhi raza shamil

phir bhi ham hi thahre hain morid-e-sitam tanha