سایۂ زلف سیہ فام کہاں تک پہنچے

سایۂ زلف سیہ فام کہاں تک پہنچے

جانے یہ سلسلۂ شام کہاں تک پہنچے

دور افق پار سہی پا تو لیا ہے تجھ کو

دیکھ ہم لے کے ترا نام کہاں تک پہنچے

یہ سسکتی ہوئی راتیں یہ بلکتے منظر

ہم بھی اے سایۂ گلفام کہاں تک پہنچے

نہ کہیں سایۂ گل ہے نہ کہیں ذکر حبیب

اور اب گردش ایام کہاں تک پہنچے

ہم تو رسوا تھے مگر ان کی نظر بھی نہ بچی

ہم پہ آئے ہوئے الزام کہاں تک پہنچے

مطمئن گرمیٔ احساس جفا سے بھی نہیں

دل کو پہنچے بھی تو آرام کہاں تک پہنچے

ان کی آنکھوں کو دیئے تھے جو مری آنکھوں نے

کس سے پوچھوں کہ وہ پیغام کہاں تک پہنچے

saya-e-zulf-e-siyah fam kahan tak pahunche

jane ye silsila-e-sham kahan tak pahunche

dur ufuq par sahi pa to liya hai tujh ko

dekh ham le ke tira nam kahan tak pahunche

ye sisakti hui raten ye bilakte manzar

ham bhi ai saya-e-gulfam kahan tak pahunche

na kahin saya-e-gul hai na kahin zikr-e-habib

aur ab gardish-e-ayyam kahan tak pahunche

ham to ruswa the magar un ki nazar bhi na bachi

ham pe ae hue ilzam kahan tak pahunche

mutmain garmi-e-ehsas-e-jafa se bhi nahin

dil ko pahunche bhi to aram kahan tak pahunche

un ki ankhon ko diye the jo miri ankhon ne

kis se puchhun ke wo paigham kahan tak pahunche