پھول پہ دھول ببول پہ شبنم دیکھنے والے دیکھتا جا

پھول پہ دھول ببول پہ شبنم دیکھنے والے دیکھتا جا

اب ہے یہی انصاف کا عالم دیکھنے والے دیکھتا جا

پروانوں کی راکھ اڑا دی باد سحر کے جھونکوں نے

شمع بنی ہے پیکر ماتم دیکھنے والے دیکھتا جا

جام بہ جام لگی ہیں مہریں مے خانوں پر پہرے ہیں

روتی ہے برسات چھما چھم دیکھنے والے دیکھتا جا

اس نگری کے راج دلارے ایک طرح کب رہتے ہیں

ڈھلتے سائے بدلتے موسم دیکھنے والے دیکھتا جا

مصلحتوں کی دھول جمی ہے اکھڑے اکھڑے قدموں پر

جھجک جھجک کر اڑتے پرچم دیکھنے والے دیکھتا جا

ایک پرانا مدفن جس میں دفن ہیں لاکھوں امیدیں

چھلنی چھلنی سینۂ آدم دیکھنے والے دیکھتا جا

ایک ترا ہی دل نہیں گھائل درد کے مارے اور بھی ہیں

کچھ اپنا کچھ دنیا کا غم دیکھنے والے دیکھتا جا

کم نظروں کی اس دنیا میں دیر بھی ہے اندھیر بھی ہے

پتھرایا ہر دیدۂ پر نم دیکھنے والے دیکھتا جا

phul pe dhul babul pe shabnam dekhne wale dekhta ja

ab hai yahi insaf ka alam dekhne wale dekhta ja

parwanon ki rakh ura di bad-e-sahar ke jhonkon ne

shama bani hai paikar matam dekhne wale dekhta ja

jam ba jam lagi hain mehren mai khanon par pahre hain

roti hai barsat chhama chham dekhne wale dekhta ja

is nagri ke raj dulare ek tarah kab rahte hain

dhalte sae badalte mausam dekhne wale dekhta ja

maslahaton ki dhul jami hai ukhre ukhre qadmon par

jhijak jhijak kar urte parcham dekhne wale dekhta ja

ek purana madfan jis mein dafn hain lakhon ummiden

chhalni chhalni sina-e-adam dekhne wale dekhta ja

ek tira hi dil nahin ghayal dard ke mare aur bhi hain

kuchh apna kuchh duniya ka gham dekhne wale dekhta ja

kam nazron ki is duniya mein der bhi hai andher bhi hai

pathraya har dida-e-pur nam dekhne wale dekhta ja