کوئی مقام سکوں راستے میں آیا نہیں

کوئی مقام سکوں راستے میں آیا نہیں

ہزار پیڑ ہیں لیکن کہیں بھی سایا نہیں

کسے پکارے کوئی آہٹوں کے صحرا میں

یہاں کبھی کوئی چہرہ نظر تو آیا نہیں

بھٹک رہے ہیں ابھی تک مسافران وصال

ترے جمال نے کوئی دیا جلایا نہیں

بکھر گیا ہے خلا میں کرن کرن ہو کر

وہ چاند جو کسی پہلو میں جگمگایا نہیں

ترس گئی ہے زمیں بادلوں کی صورت کو

کسی ندی نے کوئی گیت گنگنایا نہیں

اجڑ گیا تھا کسی زلزلے میں شہر وفا

نہ جانے پھر اسے ہم نے بھی کیوں بسایا نہیں

قتیلؔ کیسے کٹے گی یہ دوپہر غم کی

مرے نصیب میں ان گیسوؤں کا سایا نہیں

koi maqam sukun raste mein aya nahin

hazar per hain lekin kahin bhi saya nahin

kise pukare koi ahaton ke sahra mein

yahan kabhi koi chehra nazar to aya nahin

bhatak rahe hain abhi tak musafiran-e-wisal

tire jamal ne koi diya jalaya nahin

bikhar gaya hai khala mein kiran kiran ho kar

wo chand jo kisi pahlu mein jagmagaya nahin

taras gai hai zamin badalon ki surat ko

kisi nadi ne koi git gungunaya nahin

ujar gaya tha kisi zalzale mein shahr-e-wafa

na jane phir use ham ne bhi kyun basaya nahin

qatil kaise kategi ye dopahar gham ki

mire nasib mein un gesuon ka saya nahin