تمام تر اسی خانہ خراب جیسا ہے

تمام تر اسی خانہ خراب جیسا ہے

مرے لہو کا نشہ بھی شراب جیسا ہے

نہا رہا ہوں میں اس کے بدن کی کرنوں میں

وہ آدمی ہے مگر ماہتاب جیسا ہے

کروں تلاش جواہر تو ریت ہاتھ آئے

سمندروں کا چلن بھی سراب جیسا ہے

جلا گیا مجھے اپنے بدن کی ٹھنڈک سے

وہ جس کا رنگ دہکتے گلاب جیسا ہے

قتیلؔ کام و دہن اپنا ساتھ دیں کہ نہ دیں

وفا کا ذائقہ لیکن شباب جیسا ہے

tamam tar isi khana kharab jaisa hai

mire lahu ka nasha bhi sharab jaisa hai

naha raha hun main us ke badan ki kirnon mein

wo admi hai magar mahtab jaisa hai

karun talash jawahir to ret hath ae

samundaron ka chalan bhi sarab jaisa hai

jala gaya mujhe apne badan ki thandak se

wo jis ka rang dahakte gulab jaisa hai

qatil kam-o-dahan apna sath den ke na den

wafa ka zaiqa lekin shabab jaisa hai