تھی ہم آغوشی مگر کچھ بھی مجھے حاصل نہ تھا

تھی ہم آغوشی مگر کچھ بھی مجھے حاصل نہ تھا

وہ اک ایسا لمس تھا جس میں بدن شامل نہ تھا

ریت کی دلدل ملی مجھ کو سمندر پار بھی

میں وہاں اترا جہاں ساحل کبھی ساحل نہ تھا

وہ تو اک سازش تھی میرے خون کی میرے خلاف

جس کے سر الزام آیا وہ مرا قاتل نہ تھا

ہم نے کاٹے پیڑ تو سایوں کی یاد آنے لگی

لیکن اب حرف ندامت سے بھی کچھ حاصل نہ تھا

سر پہ آ گرتا ہے تکمیل محبت کا پہاڑ

ورنہ اظہار تمنا تو کوئی مشکل نہ تھا

پر لگا کر اڑ گئے آخر مری نیندوں کے ساتھ

پیار کے وہ خواب جن کا کوئی مستقبل نہ تھا

ان سے مل کر یہ بھی دیکھی شعبدہ بازی قتیلؔ

دھڑکنیں موجود تھیں سینے میں لیکن دل نہ تھا

thi ham aghoshi magar kuchh bhi mujhe hasil na tha

wo ik aisa lams tha jis mein badan shamil na tha

ret ki daldal mili mujh ko samundar par bhi

main wahan utra jahan sahil kabhi sahil na tha

wo to ik sazish thi mere khun ki mere khilaf

jis ke sar ilzam aya wo mira qatil na tha

ham ne kate per to sayon ki yad ane lagi

lekin ab harf-e-nadamat se bhi kuchh hasil na tha

sar pe a girta hai takmil-e-mohabbat ka pahar

warna izhar-e-tamanna to koi mushkil na tha

par laga kar ur gae akhir miri nindon ke sath

pyar ke wo khwab jin ka koi mustaqbil na tha

un se mil kar ye bhi dekhi shobada bazi qatil

dharkanen maujud thin sine mein lekin dil na tha