جھمکتے جھومتے موسم کا دھوکا کھا رہا ہوں میں

جھمکتے جھومتے موسم کا دھوکا کھا رہا ہوں میں

بہت لہرائے ہیں بادل مگر پیاسا رہا ہوں میں

ہوئی جب دھوپ کی بارش مرے سر پر تو کیا ہوگا

درختوں کے گھنے سایوں میں بھی سنولا رہا ہوں میں

وہی کچھ کر رہا ہوں جو کیا میرے بزرگوں نے

نئے ذہنوں پہ اپنے تجربے برسا رہا ہوں میں

یہ تہمت خاک تہمت ہے مرے ہم جرم ہمسایو

تمہاری عمر میں تم سے کہیں رسوا رہا ہوں میں

خیال آتا ہے بازاروں کی رونق دیکھ کر مجھ کو

بھرے دریا میں تنکا بن کے بہتا جا رہا ہوں میں

تری آغوش چھوٹی تو ملی وہ بد دعا مجھ کو

کہ اب اپنی ہی بانہوں میں سمٹتا جا رہا ہوں میں

قتیلؔ اب تک ندامت ہے مجھے ترک محبت پر

ذرا سا جرم کر کے آج بھی پچھتا رہا ہوں میں

jhamakte jhumte mausam ka dhoka kha raha hun main

bahut lahrae hain badal magar pyasa raha hun main

hui jab dhup ki barish mire sar par to kya hoga

darakhton ke ghane sayon mein bhi sunola raha hun main

wahi kuchh kar raha hun jo kiya mere buzurgon ne

nae zehnon pe apne tajribe barsa raha hun main

ye tohmat khak tohmat hai mire ham jurm hamsayo

tumhari umr mein tum se kahin ruswa raha hun main

khayal ata hai bazaron ki raunaq dekh kar mujh ko

bhare dariya mein tinka ban ke bahta ja raha hun main

tiri aghosh-e-chhoti to mili wo bad dua mujh ko

ke ab apni hi banhon mein simatta ja raha hun main

qatil ab tak nadamat hai mujhe tark-e-mohabbat par

zara sa jurm kar ke aj bhi puchhta raha hun main