مہرباں ہم پہ جو تقدیر ہماری ہوگی

مہرباں ہم پہ جو تقدیر ہماری ہوگی

آپ کی زلف گرہ گیر ہماری ہوگی

عمر بھر آپ ہی دیکھیں گے کوئی خواب طرب

لیکن اس خواب کی تعبیر ہماری ہوگی

آج کی رات ہے عرفان حجابات کی رات

آج ہر شمع میں تنویر ہماری ہوگی

آج پھر وصل کے اڑتے ہوئے لمحے سن لیں

وقت کے پاؤں میں زنجیر ہماری ہوگی

کچھ بھی ہو آپ کے ماحول کا معیار حیات

آپ کے ذہن میں تصویر ہماری ہوگی

تہمتوں سے ہمیں دے گا یہ جہاں داد وفا

اب اسی ڈھنگ سے توقیر ہماری ہوگی

ایک عنواں میں سمٹ آئیں گے سو نام قتیلؔ

داستاں جب کوئی تحریر ہماری ہوگی

mehrban ham pe jo taqdir hamari hogi

ap ki zulf-e-girah gir hamari hogi

umr bhar ap hi dekhenge koi khwab-e-tarab

lekin is khwab ki taabir hamari hogi

aj ki rat hai irfan hijabat ki rat

aj har shama mein tanwir hamari hogi

aj phir wasl ke urte hue lamhe sun len

waqt ke paon mein zanjir hamari hogi

kuchh bhi ho ap ke mahaul ka meyar hayat

ap ke zehn mein taswir hamari hogi

tohmaton se hamen dega ye jahan dad-e-wafa

ab isi dhang se tauqir hamari hogi

ek unwan mein simat aenge so nam qatil

dastan jab koi tahrir hamari hogi