مل جل کے برہنہ جسے دنیا نے کیا ہے

مل جل کے برہنہ جسے دنیا نے کیا ہے

اس درد نے اب میرا بدن اوڑھ لیا ہے

میں ریت کے دریا پہ کھڑا سوچ رہا ہوں

اس شہر میں پانی تو یزیدوں نے پیا ہے

اے گور کنوں قبر کا دے کر مجھے دھوکا

تم نے تو خلاؤں میں مجھے گاڑ دیا ہے

میں صاحب عزت ہوں مری لاش نہ کھولو

دستار کے پرزوں سے کفن میں نے سیا ہے

پھیلا ہے ترا کرب قتیلؔ آدھی صدی پر

حیرت ہے کہ تو اتنے برس کیسے جیا ہے

یہ بات پھر مجھے سورج بتانے آیا ہے

ازل سے میرے تعاقب میں میرا سایا ہے

بلند ہوتی چلی جا رہی ہیں دیواریں

اسیر در ہے وہ جس نے مجھے بلایا ہے

میں لا زوال تھا مٹ مٹ کے پھر ابھرتا رہا

گنوا گنوا کے مجھے زندگی نے پایا ہے

وہ جس کے نین ہیں گہرے سمندروں جیسے

وہ اپنی ذات میں مجھ کو ڈبونے آیا ہے

ملی ہے اس کو بھی شہرت قتیلؔ میری طرح

جب اس نے اپنے لبوں پر مجھے سجایا ہے

mil jal ke barahna jise duniya ne kiya hai

is dard ne ab mera badan orh liya hai

main ret ke dariya pe khara soch raha hun

is shahr mein pani to yazidon ne piya hai

ai gor kinon qabr ka de kar mujhe dhoka

tum ne to khalaon mein mujhe gar diya hai

main sahab-e-izzat hun miri lash na kholo

dastar ke purzon se kafan main ne siya hai

phaila hai tira karb qatil adhi sadi par

hairat hai ke tu itne baras kaise jiya hai

ye bat phir mujhe suraj batane aya hai

azal se mere taaqub mein mera saya hai

buland hoti chali ja rahi hain diwaren

asir-e-dar hai wo jis ne mujhe bulaya hai

main la zawal tha mit mit ke phir ubharta raha

ganwa ganwa ke mujhe zindagi ne paya hai

wo jis ke nain hain gahre samundaron jaise

wo apni zat mein mujh ko dubone aya hai

mili hai us ko bhi shohrat qatil meri tarah

jab us ne apne labon par mujhe sajaya hai