اس دور میں توفیق انا دی گئی مجھ کو

اس دور میں توفیق انا دی گئی مجھ کو

کس جرم کی آخر یہ سزا دی گئی مجھ کو

میں نے جو کیا فصل بہاراں کا تقاضا

اک پھول کی تصویر دکھا دی گئی مجھ کو

یہ کون مرے نام کو دہرا سا رہا ہے

شاید کسی گنبد میں صدا دی گئی مجھ کو

وہ ان کا ملانا مجھے اک صاحب زر سے

اوقات مری یاد دلا دی گئی مجھ کو

پہلے تو نوازا گیا میں خلعت غم سے

پھر شہریت ملک وفا دی گئی مجھ کو

حیرت ہے کہ اس بار بزرگوں کی طرف سے

تکمیل محبت کی دعا دی گئی مجھ کو

کچھ نامہ لکھے ہی تھے ابھی میرے قلم نے

کاغذ کی طرح آگ لگا دی گئی مجھ کو

گم ہو گیا مستی میں تڑپنے کا مزہ بھی

کیا چیز قتیلؔ آج پلا دی گئی مجھ کو

is daur mein taufiq ana di gai mujh ko

kis jurm ki akhir ye saza di gai mujh ko

main ne jo kiya fasl-e-baharan ka taqaza

ik phul ki taswir dikha di gai mujh ko

ye kaun mire nam ko dohra sa raha hai

shayad kisi gumbad mein sada di gai mujh ko

wo un ka milana mujhe ik sahab-e-zar se

auqat miri yad dila di gai mujh ko

pahle to nawaza gaya main khilat gham se

phir shahriyyat mulk-e-wafa di gai mujh ko

hairat hai ke is bar buzurgon ki taraf se

takmil-e-mohabbat ki dua di gai mujh ko

kuchh nama likhe hi the abhi mere qalam ne

kaghaz ki tarah ag laga di gai mujh ko

gum ho gaya masti mein tarapne ka maza bhi

kya chiz qatil aj pila di gai mujh ko