جانچ پرکھ کر دیکھ چکی تو ہر منہ بولے بھائی کو

جانچ پرکھ کر دیکھ چکی تو ہر منہ بولے بھائی کو

کہنے دے اب کوئی سچی بات قتیلؔ شفائی کو

کر دیا بالکل اپنے جیسا مجھ کو اندھے کیوپڈ نے

اپنی شہرت جان رہا ہوں میں اپنی رسوائی کو

شہرت چاہے کیسی بھی ہو لوگ توجہ دیتے ہیں

لاکھ حسیں ملتے ہیں اب تک مجھ جیسے ہرجائی کو

گھبرائی کیوں بیٹھی ہے اب غم خواروں کے نرغے میں

لے آئی ہے محفل میں جب تو اپنی تنہائی کو

سب کو سنائے قصے تو نے جس کی دھوکہ بازی کے

اس جیسا ہی پائے گی تو اپنے ہر شیدائی کو

سب سے ہنس کر ملنے والی کس نے تجھ کو سمجھا ہے

ناپ رہے ہیں مفت میں لوگ سمندر کی گہرائی کو

پاگل پن تو دیکھو جس دن ڈولی اٹھنے والی تھی

اپنے ہاتھ سے توڑ دیا اک دلہن نے شہنائی کو

کیوں اوروں کے نام سے چھپواتا ہے اپنے شعر قتیلؔ

یوں برباد کیا نہیں کرتے اپنی نیک کمائی کو

janch parakh kar dekh chuki to har munh bole bhai ko

kahne de ab koi sachchi bat qatil shifai ko

kar diya bilkul apne jaisa mujh ko andhe kiyupid ne

apni shohrat jan raha hun main apni ruswai ko

shohrat chahe kaisi bhi ho log tawajjoh dete hain

lakh hasin milte hain ab tak mujh jaise harjai ko

ghabrai kyun baithi hai ab gham khwaron ke narghe mein

le ai hai mahfil mein jab to apni tanhai ko

sab ko sunae qisse tu ne jis ki dhoka bazi ke

us jaisa hi paegi to apne har shaidai ko

sab se hans kar milne wali kis ne tujh ko samjha hai

nap rahe hain muft mein log samundar ki gahrai ko

pagal pan to dekho jis din doli uthne wali thi

apne hath se tor diya ik dulhan ne shahnai ko

kyun auron ke nam se chhupwata hai apne sher qatil

yun barbad kiya nahin karte apni nek kamai ko