جو بیت گئی اس کی خبر ہے کہ نہیں ہے

جو بیت گئی اس کی خبر ہے کہ نہیں ہے

دیکھو مرے تن پر مرا سر ہے کہ نہیں ہے

اس شہر ندامت سے جو آئے ہیں پلٹ کر

در پیش نیا ان کو سفر ہے کہ نہیں ہے

یاروں کو بہت پیار ہے زندان وفا سے

لیکن کسی دیوار میں در ہے کہ نہیں ہے

ملتی ہو ضیا جس کو چراغوں کی لوؤں سے

اس شہر میں ایسا کوئی گھر ہے کہ نہیں ہے

چہرے پہ سجا لایا ہوں میں دل کی صدائیں

دنیا میں کوئی اہل نظر ہے کہ نہیں ہے

سورج کی گزر گاہ بنے شاخ نہ جس کی

ایسا کوئی رستے میں شجر ہے کہ نہیں ہے

برسات میں کوئل سی جہاں کوک رہی تھی

آباد وہ خوابوں کا نگر ہے کہ نہیں ہے

ٹوٹی ہوئی مسجد میں کھڑا دیکھ رہا ہوں

محفوظ شوالے کا گجر ہے کہ نہیں ہے

کیوں تیرا گریباں ہے قتیلؔ اب بھی سلامت

کچھ تجھ پہ نئی رت کا اثر ہے کہ نہیں ہے

jo bit gai us ki khabar hai ke nahin hai

dekho mire tan par mira sar hai ke nahin hai

is shahr nadamat se jo ae hain palat kar

dar pesh naya un ko safar hai ke nahin hai

yaron ko bahut pyar hai zindan-e-wafa se

lekin kisi diwar mein dar hai ke nahin hai

milti ho ziya jis ko charaghon ki loon se

is shahr mein aisa koi ghar hai ke nahin hai

chehre pe saja laya hun main dil ki sadaen

duniya mein koi ahl-e-nazar hai ke nahin hai

suraj ki guzar gah bane shakh na jis ki

aisa koi raste mein shajar hai ke nahin hai

barsat mein koyal si jahan kok rahi thi

abad wo khwabon ka nagar hai ke nahin hai

tuti hui masjid mein khara dekh raha hun

mahfuz shoille ka gajar hai ke nahin hai

kyun tera gareban hai qatil ab bhi salamat

kuchh tujh pe nai rut ka asar hai ke nahin hai