شاید مرے بدن کی رسوائی چاہتا ہے

شاید مرے بدن کی رسوائی چاہتا ہے

دروازہ میرے گھر کا بینائی چاہتا ہے

اوقات ضبط اس کو اے چشم تر بتا دے

یہ دل سمندروں کی گہرائی چاہتا ہے

شہروں میں وہ گھٹن ہے اس دور میں کہ انساں

گمنام جنگلوں کی پروائی چاہتا ہے

کچھ زلزلے سمو کر زنجیر کی کھنک میں

اک رقص والہانہ سودائی چاہتا ہے

کچھ اس لیے بھی اپنے چرچے ہیں شہر بھر میں

اک پارسا ہماری رسوائی چاہتا ہے

ہر شخص کی جبیں پر کرتے ہیں رقص تارے

ہر شخص زندگی کی رعنائی چاہتا ہے

اب چھوڑ ساتھ میرا اے یاد نوجوانی

اس عمر کا مسافر تنہائی چاہتا ہے

میں جب قتیلؔ اپنا سب کچھ لٹا چکا ہوں

اب میرا پیار مجھ سے دانائی چاہتا ہے

shayad mire badan ki ruswai chahta hai

darwaza mere ghar ka binai chahta hai

auqat zabt us ko ai chashm-e-tar bata de

ye dil samundaron ki gahrai chahta hai

shahron mein wo ghutan hai is daur mein ke insan

gumnam jangalon ki purwai chahta hai

kuchh zalzale samo kar zanjir ki khanak mein

ik raqs walhana saudai chahta hai

kuchh is liye bhi apne charche hain shahr bhar mein

ik parsa hamari ruswai chahta hai

har shakhs ki jabin par karte hain raqs tare

har shakhs zindagi ki raanai chahta hai

ab chhor sath mera ai yad naujawani

is umr ka musafir tanhai chahta hai

main jab qatil apna sab kuchh luta chuka hun

ab mera pyar mujh se danai chahta hai