منظر سمیٹ لائے ہیں جو تیرے گاؤں کے

منظر سمیٹ لائے ہیں جو تیرے گاؤں کے

نیندیں چرا رہے ہیں وہ جھونکے ہواؤں کے

تیری گلی سے چاند زیادہ حسیں نہیں

کہتے سنے گئے ہیں مسافر خلاؤں کے

پل بھر کو تیری یاد میں دھڑکا تھا دل مرا

اب دور تک بھنور سے پڑے ہیں صداؤں کے

داد سفر ملی ہے کسے راہ شوق میں

ہم نے مٹا دئے ہیں نشاں اپنے پاؤں کے

جب تک نہ کوئی آس تھی یہ پیاس بھی نہ تھی

بے چین کر گئے ہمیں سائے گھٹاؤں کے

ہم نے لیا ہے جب بھی کسی راہزن کا نام

چہرے اتر اتر گئے کچھ رہنماؤں کے

اگلے گا آفتاب کچھ ایسی بلا کی دھوپ

رہ جائیں گے زمین پہ کچھ داغ چھاؤں کے

manzar samet lae hain jo tere gaon ke

ninden chura rahe hain wo jhonke hawaon ke

teri gali se chand ziyada hasin nahin

kahte sune gae hain musafir khalaon ke

pal bhar ko teri yad mein dharka tha dil mira

ab dur tak bhanwar se pare hain sadaon ke

dad-e-safar mili hai kise rah-e-shauq mein

ham ne mita diye hain nishan apne paon ke

jab tak na koi as thi ye pyas bhi na thi

be chain kar gae hamen sae ghataon ke

ham ne liya hai jab bhi kisi rahzan ka nam

chehre utar utar gae kuchh rahnumaon ke

aglega aftab kuchh aisi bala ki dhup

rah jaenge zamin pe kuchh dagh chhaon ke