تتلیوں کا رنگ ہو یا جھومتے بادل کا رنگ

تتلیوں کا رنگ ہو یا جھومتے بادل کا رنگ

ہم نے ہر اک رنگ کو جانا ترے آنچل کا رنگ

تیری آنکھوں کی چمک ہے یا ستاروں کی ضیا

رات کا ہے گھپ اندھیرا یا ترے کاجل کا رنگ

دھڑکنوں کے تال پر وہ حال اپنے دل کا ہے

جیسے گوری کے تھرکتے پاؤں میں پائل کا رنگ

پھینکنا تم سوچ کر لفظوں کا یہ کڑوا گلال

پھیل جاتا ہے کبھی صدیوں پہ بھی اک پل کا رنگ

آہ یہ رنگین موسم خون کی برسات کا

چھا رہا ہے عقل پر جذبات کی ہلچل کا رنگ

اب تو شبنم کا ہر اک موتی ہے کنکر کی طرح

ہاں اسی گلشن پہ چھایا تھا کبھی مخمل کا رنگ

پھر رہے ہیں لوگ ہاتھوں میں لیے خنجر کھلے

کوچے کوچے میں اب آتا ہے نظر مقتل کا رنگ

چار جانب جس کی رعنائی کے چرچے ہیں قتیلؔ

جانے کب دیکھیں گے ہم اس آنے والی کل کا رنگ

titliyon ka rang ho ya jhumte badal ka rang

ham ne har ik rang ko jana tire anchal ka rang

teri ankhon ki chamak hai ya sitaron ki ziya

rat ka hai ghap andhera ya tire kajal ka rang

dharkanon ke tal par wo hal apne dil ka hai

jaise gori ke thirakte paon mein pail ka rang

phenkna tum soch kar lafzon ka ye karwa gulal

phail jata hai kabhi sadiyon pe bhi ik pal ka rang

ah ye rangin mausam khun ki barsat ka

chha raha hai aql par jazbat ki halchal ka rang

ab to shabnam ka har ik moti hai kankar ki tarah

han isi gulshan pe chhaya tha kabhi makhmal ka rang

phir rahe hain log hathon mein liye khanjar khule

kuche kuche mein ab ata hai nazar maqtal ka rang

char janib jis ki raanai ke charche hain qatil

jane kab dekhenge ham is ane wali kal ka rang