آواز کے ہم راہ سراپا بھی تو دیکھوں

آواز کے ہم راہ سراپا بھی تو دیکھوں

اے جان سخن میں تیرا چہرہ بھی تو دیکھوں

دستک تو کچھ ایسی ہے کہ دل چھونے لگی ہے

اس حبس میں بارش کا یہ جھونکا بھی تو دیکھوں

صحرا کی طرح رہتے ہوئے تھک گئیں آنکھیں

دکھ کہتا ہے میں اب کوئی دریا بھی تو دیکھوں

یہ کیا کہ وہ جب چاہے مجھے چھین لے مجھ سے

اپنے لئے وہ شخص تڑپتا بھی تو دیکھوں

اب تک تو مرے شعر حوالہ رہے تیرا

اب میں تری رسوائی کا چرچا بھی تو دیکھوں

اب تک جو سراب آئے تھے انجانے میں آئے

پہچانے ہوئے رستوں کا دھوکا بھی تو دیکھوں

awaz ke ham rah sarapa bhi to dekhun

ai jan-e-sukhan mein tera chehra bhi to dekhun

dastak to kuchh aisi hai ke dil chhune lagi hai

is habs mein barish ka ye jhonka bhi to dekhun

sahra ki tarah rahte hue thak gain ankhen

dukh kahta hai main ab koi dariya bhi to dekhun

ye kya ke wo jab chahe mujhe chhin le mujh se

apne liye wo shakhs tarapta bhi to dekhun

ab tak to mire sher hawala rahe tera

ab main tiri ruswai ka charcha bhi to dekhun

ab tak jo sarab ae the anjane mein ae

pahchane hue raston ka dhoka bhi to dekhun