خوشی کی بات ہے یا دکھ کا منظر دیکھ سکتی ہوں

خوشی کی بات ہے یا دکھ کا منظر دیکھ سکتی ہوں

تری آواز کا چہرہ میں چھو کر دیکھ سکتی ہوں

ابھی تیرے لبوں پہ ذکر فصل گل نہیں آیا

مگر اک پھول کھلتے اپنے اندر دیکھ سکتی ہوں

مجھے تیری محبت نے عجب اک روشنی بخشی

میں اس دنیا کو اب پہلے سے بہتر دیکھ سکتی ہوں

کنارہ ڈھونڈنے کی چاہ تک مجھ میں نہیں ہوگی

میں اپنے گھر میں اک ایسا سمندر دیکھ سکتی ہوں

وصال و ہجر اب یکساں ہیں وہ منزل ہے چاہت میں

میں آنکھیں بند کر کے تجھ کو اکثر دیکھ سکتی ہوں

ابھی تیرے سوا دنیا بھی ہے موجود اس دل میں

میں خود کو کس طرح تیرے برابر دیکھ سکتی ہوں

khushi ki bat hai ya dukh ka manzar dekh sakti hun

tiri awaz ka chehra mein chhu kar dekh sakti hun

abhi tere labon pe zikr fasl-e-gul nahin aya

magar ik phul khulte apne andar dekh sakti hun

mujhe teri mohabbat ne ajab ik raushni bakhshi

main is duniya ko ab pahle se behtar dekh sakti hun

kinara dhundne ki chah tak mujh mein nahin hogi

main apne ghar mein ik aisa samundar dekh sakti hun

wisal-o-hijr ab yaksan hain wo manzil hai chahat mein

main ankhen band kar ke tujh ko aksar dekh sakti hun

abhi tere siwa duniya bhi hai maujud is dil mein

main khud ko kis tarah tere barabar dekh sakti hun