ہوا مہک اٹھی رنگ چمن بدلنے لگا

ہوا مہک اٹھی رنگ چمن بدلنے لگا

وہ میرے سامنے جب پیرہن بدلنے لگا

بہم ہوئے ہیں تو اب گفتگو نہیں ہوتی

بیان حال میں طرز سخن بدلنے لگا

اندھیرے میں بھی مجھے جگمگا گیا ہے کوئی

بس اک نگاہ سے رنگ بدن بدلنے لگا

ذرا سی دیر کو بارش رکی تھی شاخوں پر

مزاج سوسن و سرو و سمن بدلنے لگا

فراز کوہ پہ بجلی کچھ اس طرح چمکی

لباس وادی و دشت و دمن بدلنے لگا

hawa mahak uthi rang-e-chaman badalne laga

wo mere samne jab pairahan badalne laga

baham hue hain to ab guftugu nahin hoti

bayan-e-hal mein tarz-e-sukhan badalne laga

andhere mein bhi mujhe jagmaga gaya hai koi

bas ik nigah se rang-e-badan badalne laga

zara si der ko barish ruki thi shakhon par

mizaj-e-sosan-o-sarw-o-saman badalne laga

faraz-e-koh pe bijli kuchh is tarah chamki

libas-e-wadi-o-dasht-o-daman badalne laga