مر بھی جاؤں تو کہاں لوگ بھلا ہی دیں گے

مر بھی جاؤں تو کہاں لوگ بھلا ہی دیں گے

لفظ میرے مرے ہونے کی گواہی دیں گے

لوگ تھرا گئے جس وقت منادی آئی

آج پیغام نیا ظل الٰہی دیں گے

جھونکے کچھ ایسے تھپکتے ہیں گلوں کے رخسار

جیسے اس بار تو پت جھڑ سے بچا ہی دیں گے

ہم وہ شب زاد کہ سورج کی عنایات میں بھی

اپنے بچوں کو فقط کور نگاہی دیں گے

آستیں سانپوں کی پہنیں گے گلے میں مالا

اہل کوفہ کو نئی شہر پناہی دیں گے

شہر کی چابیاں اعدا کے حوالے کر کے

تحفتاً پھر انہیں مقتول سپاہی دیں گے

mar bhi jaun to kahan log bhala hi denge

lafz mere mire hone ki gawahi denge

log tharra gae jis waqt munadi ai

aj paigham naya zill-e-ilahi denge

jhonke kuchh aise thapakte hain gulon ke rukhsar

jaise is bar to pat jhar se bacha hi denge

ham wo shab zad ke suraj ki inayat mein bhi

apne bachchon ko faqat kor nigahi denge

astin sanpon ki pahnenge gale mein mala

ahl-e-kofa ko nai shahr panahi denge

shahr ki chabiyan aada ke hawale kar ke

tuhafta phir unhen maqtul sipahi denge