نگر میں شام ہو گئی ہے کاہش معاش میں

نگر میں شام ہو گئی ہے کاہش معاش میں

زمیں پہ پھر رہے ہیں لوگ رزق کی تلاش میں

گزر گئی تمام عمر اس حصار تنگ میں

کشش ہے اک مریض سی مکاں کی بود و باش میں

ہلال حرف خوف سا فصیل سنگ نیل پر

یا ہے عدم کا زرد رنگ خواہش خراش میں

چمک رہے ہیں تعزیے بلا کی تیز دھوپ میں

مہک ہے آب مرگ کی فشار عرق پاش میں

منیرؔ حسن باطنی کو کوئی دیکھتا نہیں

متاع چشم کھو گئی لباس کی تراش میں

nagar mein sham ho gai hai kahish-e-maash mein

zamin pe phir rahe hain log rizq ki talash mein

guzar gai tamam umr is hisar-e-tang mein

kashish hai ik mariz si makan ki bud-o-bash mein

hilal harf khauf sa fasil-e-sang nil par

ya hai adam ka zard rang khwahish-e-kharash mein

chamak rahe hain taaziye bala ki tez dhup mein

mahak hai ab marg ki fishar irq pash mein

munir husn batini ko koi dekhta nahin

mata-e-chashm kho gai libas ki tarash mein