اک مسافت پاؤں شل کرتی ہوئی سی خواب میں

اک مسافت پاؤں شل کرتی ہوئی سی خواب میں

اک سفر گہرا مسلسل زردیٔ مہتاب میں

تیز ہے بوئے شگوفہ ہائے مرگ ناگہاں

گھر گئی خاک زمیں جیسے حصار آب میں

حاصل جہد مسلسل مستقل آزردگی

کام کرتا ہوں ہوا میں جستجو نایاب میں

تنگ کرتی ہے مکاں میں خواہش سیر بسیط

ہے اثر دائم فلک کا صحن کی محراب میں

اے منیرؔ اب اس قدر خاموشیاں یہ کیا ہوا

یہ صفت آئی کہاں سے پارۂ سیماب میں

ik masafat paon shil karti hui si khwab mein

ik safar gahra musalsal zardi-e-mahtab mein

tez hai bu-e-shagufa ha-e-marg-e-nagahan

ghar gai khak zamin jaise hisar-e-ab mein

hasil-e-jahd-e-musalsal mustaqil azurdagi

kam karta hun hawa mein justuju nayab mein

tang karti hai makan mein khwahish-e-sair-e-basit

hai asar daim falak ka sehn ki mehrab mein

ai munir ab is qadar khamoshiyan ye kya hua

ye sifat ai kahan se para-e-simab mein