ساعت ہجراں ہے اب کیسے جہانوں میں رہوں

ساعت ہجراں ہے اب کیسے جہانوں میں رہوں

کن علاقوں میں بسوں میں کن مکانوں میں رہوں

ایک دشت لا مکاں پھیلا ہے میرے ہر طرف

دشت سے نکلوں تو جا کر کن ٹھکانوں میں رہوں

علم ہے جو پاس میرے کس جگہ افشا کروں

یا ابد تک اس خبر کے رازدانوں میں رہوں

وصل کی شام سیہ اس سے پرے آبادیاں

خواب دائم ہے یہی میں جن زمانوں میں رہوں

یہ سفر معلوم کا معلوم تک ہے اے منیرؔ

میں کہاں تک ان حدوں کے قید خانوں میں رہوں

saat-e-hijran hai ab kaise jahanon mein rahun

kin ilaqon mein bason mein kin makanon mein rahun

ek dasht-e-la makan phaila hai mere har taraf

dasht se niklun to ja kar kin thikanon mein rahun

ilm hai jo pas mere kis jagah ifsha karun

ya abad tak is khabar ke razdanon mein rahun

wasl ki sham-e-siyah us se pare abadiyan

khwab daim hai yahi mein jin zamanon mein rahun

ye safar maalum ka maalum tak hai ai munir

main kahan tak in hadon ke qaid khanon mein rahun