ایک میں اور اتنے لاکھوں سلسلوں کے سامنے

ایک میں اور اتنے لاکھوں سلسلوں کے سامنے

ایک صوت گنگ جیسے گنبدوں کے سامنے

مٹتے جاتے نقش دود دم کی آمد رفت سے

کھلتے جاتے بے صدا لب آئنوں کے سامنے

ہے ہوائے سیر آب اور اجنبی سی سر زمیں

اڑ رہی ہے خاک کہنہ ساحلوں کے سامنے

آگ جلتی ہے گھروں میں یا کوئی تصویر ہے

یادگار جرم آدم خاکیوں کے سامنے

دشمنی رسم جہاں ہے دوستی حرف غلط

آدمی تنہا کھڑا ہے ظالموں کے سامنے

چار چپ چیزیں ہیں بحر و بر فلک اور کوہسار

دل دہل جاتا ہے ان خالی جگہوں کے سامنے

باطن زردار پر اسرار ہے جیسے منیرؔ

کان زر کی بند ہیبت مشعلوں کے سامنے

ek main aur itne lakhon silsilon ke samne

ek saut-e-gang jaise gumbadon ke samne

mitte jate naqsh-e-dud-e-dam ki amad raft se

khulte jate be sada lab ainon ke samne

hai hawa-e-sair-e-ab aur ajnabi si sar zamin

ur rahi hai khak kohna sahilon ke samne

ag jalti hai gharon mein ya koi taswir hai

yadgar-e-jurm-e-adam khakiyon ke samne

dushmani rasm-e-jahan hai dosti harf-e-ghalat

admi tanha khara hai zalimon ke samne

char chup chizen hain bahr-o-bar falak aur kohsar

dil duhul jata hai un khali jaghon ke samne

batin-e-zardar pur asrar hai jaise munir

kan zar ki band haibat mashlon ke samne