بے حقیقت دوریوں کی داستاں ہوتی گئی

بے حقیقت دوریوں کی داستاں ہوتی گئی

یہ زمیں مثل سراب آسماں ہوتی گئی

کس خرابی میں ہوا پیدا جمال زندگی

اصل کس نقل مکاں میں رائیگاں ہوتی گئی

تنگئ امروز میں آئندہ کے آثار ہیں

ایک ضد بڑھ کر کسی سکھ کا نشاں ہوتی گئی

دوسرے رخ کا پتہ جس کو تھا وہ خاموش تھا

وہ کہانی بس اسی رخ سے بیاں ہوتی گئی

اک صدا اٹھی تو اک عالم ہوا پیدا منیرؔ

اک کلی مہکی تو پورا گلستاں ہوتی گئی

be haqiqat duriyon ki dastan hoti gai

ye zamin misl-e-sarab-e-asman hoti gai

kis kharabi mein hua paida jamal-e-zindagi

asl kis naql makan mein raigan hoti gai

tangi-e-imroz mein ainda ke asar hain

ek zid barh kar kisi sukh ka nishan hoti gai

dusre rukh ka pata jis ko tha wo khamosh tha

wo kahani bas usi rukh se bayan hoti gai

ik sada uthi to ik alam hua paida munir

ik kali mahki to pura gulsitan hoti gai