Arooz is now on the App Store, for iPhone and iPad. Download →

All poetry

اس شہر کے یہیں کہیں ہونے کا رنگ ہے

Munir Niazi (1928–2006)

اس شہر کے یہیں کہیں ہونے کا رنگ ہے

اس خاک میں کہیں کہیں سونے کا رنگ ہے

پائیں چمن ہے خود رو درختوں کا جھنڈ سا

محراب در پہ اس کے نہ ہونے کا رنگ ہے

طوفان ابر و باد نہاں ساحلوں پہ ہے

دریا کی خامشی میں ڈبونے کا رنگ ہے

اس عہد سے وفا کا صلہ مرگ رائیگاں

اس کی فضا میں ہر گھڑی کھونے کا رنگ ہے

ہے سر زمین شور کہ اک چادر صفا

کیسا عجیب مردہ بچھونے کا رنگ ہے

سرخی ہے جو گلاب سی آنکھوں میں اے منیرؔ

خار بہار دل میں چبھونے کا رنگ ہے