دن اگر چڑھتا ادھر سے میں ادھر سے جاگتا

دن اگر چڑھتا ادھر سے میں ادھر سے جاگتا

حسن سارا مشرقوں کا ساتھ میرے جاگتا

میں اگر ملتا نہ اس سے اس ازل کی شام میں

خواب ان دیوار و در کا دل میں کیسے جاگتا

ہے مثال باد گلشن جاگنا اس شوخ کا

رنگ جیسے دور کا رنگوں کے پیچھے جاگتا

اب وہ گھر باقی نہیں پر کاش اس تعمیر سے

ایک شہر آرزو آنکھوں کے آگے جاگتا

چاند چڑھتا دیکھنا بے حد سمندر پر منیرؔ

دیکھنا پھر بحر کو اس کی کشش سے جاگتا

din agar charhta idhar se main idhar se jagta

husn sara mashriqon ka sath mere jagta

main agar milta na us se is azal ki sham mein

khwab un diwar-o-dar ka dil mein kaise jagta

hai misal-e-bad-e-gulshan jagna us shokh ka

rang jaise dur ka rangon ke pichhe jagta

ab wo ghar baqi nahin par kash is taamir se

ek shahr-e-arzu ankhon ke age jagta

chand charhta dekhna be had samundar par munir

dekhna phir bahr ko us ki kashish se jagta