ہے اس گل رنگ کا دیوار ہونا

ہے اس گل رنگ کا دیوار ہونا

کہ جیسے خواب سے بیدار ہونا

بتاتی ہے مہک دست حنا کی

کسی در کا پس دیوار ہونا

اسے رکھتا ہے صحراؤں میں حیراں

دل شاعر کا پراسرار ہونا

کمال شوق کا حاصل یہی ہے

ہمارا شہر سے بے زار ہونا

فراق آغاز ہے ان ساعتوں کا

ہے آخر جن کا وصل یار ہونا

یہی ہونا تھا آخر دشت غم کو

ہمارے ہاتھ سے گلزار ہونا

محبت کا سبب ہے بے نیازی

کشش اس کی ہے بس دشوار ہونا

منیرؔ اچھا نہیں لگتا یہ تیرا

کسی کے ہجر میں بیمار ہونا

hai us gul rang ka diwar hona

ke jaise khwab se bedar hona

batati hai mahak dast-e-hina ki

kisi dar ka pas-e-diwar hona

use rakhta hai sahraon mein hairan

dil-e-shayar ka purasrar hona

kamal-e-shauq ka hasil yahi hai

hamara shahr se be zar hona

firaq aghaz hai in saaton ka

hai akhir jin ka wasl-e-yar hona

yahi hona tha akhir dasht-e-gham ko

hamare hath se gulzar hona

mohabbat ka sabab hai be niyazi

kashish us ki hai bas dushwar hona

munir achchha nahin lagta ye tera

kisi ke hijr mein bimar hona