غزلوں کی دھنک اوڑھ مرے شعلہ بدن تو

غزلوں کی دھنک اوڑھ مرے شعلہ بدن تو

ہے میرا سخن تو مرا موضوع سخن تو

کلیوں کی طرح پھوٹ سر شاخ تمنا

خوشبو کی طرح پھیل چمن تا بہ چمن تو

نازل ہو کبھی ذہن پہ آیات کی صورت

آیات میں ڈھل جا کبھی جبریل دہن تو

اب کیوں نہ سجاؤں میں تجھے دیدہ و دل میں

لگتا ہے اندھیرے میں سویرے کی کرن تو

پہلے نہ کوئی رمز سخن تھی نہ کنایہ

اب نقطۂ تکمیل ہنر محور فن تو

یہ کم تو نہیں تو مرا معیار نظر ہے

اے دوست مرے واسطے کچھ اور نہ بن تو

ممکن ہو تو رہنے دے مجھے ظلمت جاں میں

ڈھونڈے گا کہاں چاندنی راتوں کا کفن تو

ghazlon ki dhanak orh mire shola badan to

hai mera sukhan to mira mauzu-e-sukhan to

kaliyon ki tarah phut sar-e-shakh-e-tamanna

khushbu ki tarah phail chaman ta ba chaman to

nazil ho kabhi zehn pe ayat ki surat

ayat mein dhal ja kabhi jibril dahan to

ab kyun na sajaun mein tujhe dida-o-dil mein

lagta hai andhere mein sawere ki kiran to

pahle na koi ramz-e-sukhan thi na kinaya

ab nuqta-e-takmil-e-hunar mehwar fan to

ye kam to nahin to mira meyar-e-nazar hai

ai dost mire waste kuchh aur na ban to

mumkin ho to rahne de mujhe zulmat jan mein

dhundega kahan chandni raton ka kafan to