اشارے کیا نگۂ ناز دل ربا کے چلے

اشارے کیا نگۂ ناز دل ربا کے چلے

ستم کے تیر چلے نیمچے قضا کے چلے

گنہ کا بوجھ جو گردن پہ ہم اٹھا کے چلے

خدا کے آگے خجالت سے سر جھکا کے چلے

طلب سے عار ہے اللہ سے فقیروں کو

کہیں جو ہو گیا پھیرا صدا سنا کے چلے

پکارے کہتی تھی حسرت سے نعش عاشق کی

صنم کدھر کو ہمیں خاک میں ملا کے چلے

مثال ماہیٔ بے آب موجیں تڑپا کیں

حباب پھوٹ کے روئے جو تم نہا کے چلے

مقام یوں ہوا اس کارگاہ دنیا میں

کہ جیسے دن کو مسافر سرا میں آ کے چلے

کسی کا دل نہ کیا ہم نے پائمال کبھی

چلے جو راہ تو چیونٹی کو بھی بچا کے چلے

ملا جنہیں انہیں افتادگی سے اوج ملا

انہیں نے کھائی ہے ٹھوکر جو سر اٹھا کے چلے

انیس دم کا بھروسہ نہیں ٹھہر جاؤ

چراغ لے کے کہاں سامنے ہوا کے چلے

ishare kya nigah-e-naz-e-dil ruba ke chale

sitam ke tir chale nimache qaza ke chale

gunah ka bojh jo gardan pe ham utha ke chale

khuda ke age khijalat se sar jhuka ke chale

talab se ar hai allah se faqiron ko

kahin jo ho gaya phera sada suna ke chale

pukare kahti thi hasrat se naash ashiq ki

sanam kidhar ko hamen khak mein mila ke chale

misal-e-mahi-e-be ab maujen tarpa kin

habab phut ke roe jo tum naha ke chale

maqam yun hua is kargah duniya mein

ke jaise din ko musafir sara mein a ke chale

kisi ka dil na kiya ham ne paimal kabhi

chale jo rah to chiyunti ko bhi bacha ke chale

mila jinhen unhen uftadagi se auj mila

unhen ne khai hai thokar jo sar utha ke chale

unnis dam ka bharosa nahin thahar jao

charagh le ke kahan samne hawa ke chale