وہ بھی سراہنے لگے ارباب فن کے بعد

وہ بھی سراہنے لگے ارباب فن کے بعد

داد سخن ملی مجھے ترک سخن کے بعد

دیوانہ وار چاند سے آگے نکل گئے

ٹھہرا نہ دل کہیں بھی تری انجمن کے بعد

ہونٹوں کو سی کے دیکھیے پچھتائیے گا آپ

ہنگامے جاگ اٹھتے ہیں اکثر گھٹن کے بعد

غربت کی ٹھنڈی چھاؤں میں یاد آئی اس کی دھوپ

قدر وطن ہوئی ہمیں ترک وطن کے بعد

اعلان حق میں خطرۂ دار و رسن تو ہے

لیکن سوال یہ ہے کہ دار و رسن کے بعد

انساں کی خواہشوں کی کوئی انتہا نہیں

دو گز زمیں بھی چاہئے دو گز کفن کے بعد

wo bhi sarahne lage arbab-e-fan ke baad

dad-e-sukhan mili mujhe tark-e-sukhan ke baad

diwana war chand se age nikal gae

thahra na dil kahin bhi tiri anjuman ke baad

honton ko si ke dekhiye pachhtaiyega ap

hangame jag uthte hain aksar ghutan ke baad

ghurbat ki thandi chhaon mein yad ai us ki dhup

qadar watan hui hamen tark-e-watan ke baad

elan-e-haq mein khatra-e-dar-o-rasan to hai

lekin sawal ye hai ke dar-o-rasan ke baad

insan ki khwahishon ki koi intiha nahin

do gaz zamin bhi chahiye do gaz kafan ke baad