Arooz is now on the App Store, for iPhone and iPad. Download →

All poetry

شب وہی لیکن ستارہ اور ہے

Parveen Shakir (1952–1994)

شب وہی لیکن ستارہ اور ہے

اب سفر کا استعارہ اور ہے

ایک مٹھی ریت میں کیسے رہے

اس سمندر کا کنارہ اور ہے

موج کے مڑنے میں کتنی دیر ہے

ناؤ ڈالی اور دھارا اور ہے

جنگ کا ہتھیار طے کچھ اور تھا

تیر سینے میں اتارا اور ہے

متن میں تو جرم ثابت ہے مگر

حاشیہ سارے کا سارا اور ہے

ساتھ تو میرا زمیں دیتی مگر

آسماں کا ہی اشارہ اور ہے

دھوپ میں دیوار ہی کام آئے گی

تیز بارش کا سہارا اور ہے

ہارنے میں اک انا کی بات تھی

جیت جانے میں خسارا اور ہے

سکھ کے موسم انگلیوں پر گن لیے

فصل غم کا گوشوارہ اور ہے

دیر سے پلکیں نہیں جھپکیں مری

پیش جاں اب کے نظارہ اور ہے

اور کچھ پل اس کا رستہ دیکھ لوں

آسماں پر ایک تارہ اور ہے

حد چراغوں کی یہاں سے ختم ہے

آج سے رستہ ہمارا اور ہے