وہ ہم سفر تھا مگر اس سے ہم نوائی نہ تھی

وہ ہم سفر تھا مگر اس سے ہم نوائی نہ تھی

کہ دھوپ چھاؤں کا عالم رہا جدائی نہ تھی

نہ اپنا رنج نہ اوروں کا دکھ نہ تیرا ملال

شب فراق کبھی ہم نے یوں گنوائی نہ تھی

محبتوں کا سفر اس طرح بھی گزرا تھا

شکستہ دل تھے مسافر شکستہ پائی نہ تھی

عداوتیں تھیں تغافل تھا رنجشیں تھیں بہت

بچھڑنے والے میں سب کچھ تھا بے وفائی نہ تھی

بچھڑتے وقت ان آنکھوں میں تھی ہماری غزل

غزل بھی وہ جو کسی کو ابھی سنائی نہ تھی

کسے پکار رہا تھا وہ ڈوبتا ہوا دن

صدا تو آئی تھی لیکن کوئی دہائی نہ تھی

کبھی یہ حال کہ دونوں میں یک دلی تھی بہت

کبھی یہ مرحلہ جیسے کہ آشنائی نہ تھی

عجیب ہوتی ہے راہ سخن بھی دیکھ نصیر

وہاں بھی آ گئے آخر جہاں رسائی نہ تھی

wo ham safar tha magar us se ham nawai na thi

ke dhup chhaon ka alam raha judai na thi

na apna ranj na auron ka dukh na tera malal

shab-e-firaq kabhi ham ne yun ganwai na thi

mohabbaton ka safar is tarah bhi guzra tha

shikasta dil the musafir shikasta pai na thi

adawaten thin taghaful tha ranjishen thin bahut

bichharne wale mein sab kuchh tha be wafai na thi

bichharte waqt in ankhon mein thi hamari ghazal

ghazal bhi wo jo kisi ko abhi sunai na thi

kise pukar raha tha wo dubta hua din

sada to ai thi lekin koi duhai na thi

kabhi ye hal ke donon mein yak dili thi bahut

kabhi ye marhala jaise ke ashnai na thi

ajib hoti hai rah-e-sukhan bhi dekh nasir

wahan bhi a gae akhir jahan rasai na thi