صبا کا نرم سا جھونکا بھی تازیانہ ہوا

صبا کا نرم سا جھونکا بھی تازیانہ ہوا

یہ وار مجھ پہ ہوا بھی تو غائبانہ ہوا

اسی نے مجھ پہ اٹھائے ہیں سنگ جس کے لیے

میں پاش پاش ہوا گھر نگار خانہ ہوا

جھلس رہا تھا بدن گرمئ نفس سے مگر

ترے خیال کا خورشید شامیانہ ہوا

خود اپنے ہجر کی خواہش مجھے عزیز رہی

یہ تیرے وصل کا قصہ تو اک بہانہ ہوا

خدا کی سرد مزاجی سما گئی مجھ میں

مری تلاش کا سودا پیمبرانہ ہوا

میں اک شجر کی طرح رہگزر میں ٹھہرا ہوں

تھکن اتار کے تو کس طرف روانہ ہوا

وہ شخص جس کے لیے شعر کہہ رہا ہوں نصیر

غزل سنائے ہوئے اس کو اک زمانہ ہوا

saba ka narm sa jhonka bhi taziyana hua

ye war mujh pe hua bhi to ghaibana hua

usi ne mujh pe uthae hain sang jis ke liye

main pash pash hua ghar nigar khana hua

jhulas raha tha badan garmi-e-nafas se magar

tire khayal ka khurshid shamyana hua

khud apne hijr ki khwahish mujhe aziz rahi

ye tere wasl ka qissa to ik bahana hua

khuda ki sard mizaji sama gai mujh mein

miri talash ka sauda payambarana hua

main ik shajar ki tarah rahguzar mein thahra hun

thakan utar ke to kis taraf rawana hua

wo shakhs jis ke liye sher kah raha hun nasir

ghazal sunae hue us ko ik zamana hua