نیا ہے شہر نئے آسرے تلاش کروں
Mohsin Naqvi (1947–1996)نیا ہے شہر نئے آسرے تلاش کروں
تو کھو گیا ہے کہاں اب تجھے تلاش کروں
جو دشت میں بھی جلاتے تھے فصل گل کے چراغ
میں شہر میں بھی وہی آبلے تلاش کروں
تو عکس ہے تو کبھی میری چشم تر میں اتر
ترے لیے میں کہاں آئنے تلاش کروں
تجھے حواس کی آوارگی کا علم کہاں
کبھی میں تجھ کو ترے سامنے تلاش کروں
غزل کہوں کبھی سادہ سے خط لکھوں اس کو
اداس دل کے لیے مشغلے تلاش کروں
مرے وجود سے شاید ملے سراغ ترا
کبھی میں خود کو ترے واسطے تلاش کروں
میں چپ رہوں کبھی بے وجہ ہنس پڑوں محسن
اسے گنوا کے عجب حوصلے تلاش کروں
naya hai shahr nae asre talash karun
tu kho gaya hai kahan ab tujhe talash karun
jo dasht mein bhi jalate the fasl-e-gul ke charagh
main shahr mein bhi wahi able talash karun
tu aks hai to kabhi meri chashm-e-tar mein utar
tire liye main kahan aine talash karun
tujhe hawas ki awargi ka ilm kahan
kabhi main tujh ko tire samne talash karun
ghazal kahun kabhi sada se khat likhun us ko
udas dil ke liye mashghale talash karun
mire wajud se shayad mile suragh tira
kabhi main khud ko tire waste talash karun
main chup rahun kabhi be wajh hans parun mohsin
use ganwa ke ajab hausle talash karun