کس نے سنگ خامشی پھینکا بھرے بازار پر

کس نے سنگ خامشی پھینکا بھرے بازار پر

اک سکوت مرگ طاری ہے در و دیوار پر

تو نے اپنی زلف کے سائے میں افسانے کہے

مجھ کو زنجیریں ملی ہیں جرأت اظہار پر

شاخ عریاں پر کھلا اک پھول اس انداز سے

جس طرح تازہ لہو چمکے نئی تلوار پر

سنگ دل احباب کے دامن میں رسوائی کے پھول

میں نے دیکھا ہے نیا منظر فراز دار پر

اب کوئی تہمت بھی وجہ کرب رسوائی نہیں

زندگی اک عمر سے چپ ہے ترے اصرار پر

میں سر مقتل حدیث زندگی کہتا رہا

انگلیاں اٹھتی رہیں محسنؔ مرے کردار پر

kis ne sang-e-khamushi phenka bhare bazar par

ik sukut-e-marg tari hai dar-o-diwar par

tu ne apni zulf ke sae mein afsane kahe

mujh ko zanjiren mili hain jurat-e-izhar par

shakh-e-uryan par khula ik phul is andaz se

jis tarah taza lahu chamke nai talwar par

sang dil ahbab ke daman mein ruswai ke phul

main ne dekha hai naya manzar faraz-e-dar par

ab koi tohmat bhi wajh-e-karb-e-ruswai nahin

zindagi ik umr se chup hai tire israr par

main sar-e-maqtal hadis-e-zindagi kahta raha

ungliyan uthti rahen mohsin mire kirdar par