جب سے اس نے شہر کو چھوڑا ہر رستہ سنسان ہوا

جب سے اس نے شہر کو چھوڑا ہر رستہ سنسان ہوا

اپنا کیا ہے سارے شہر کا اک جیسا نقصان ہوا

یہ دل یہ آسیب کی نگری مسکن سوچوں وہموں کا

سوچ رہا ہوں اس نگری میں تو کب سے مہمان ہوا

صحرا کی منہ زور ہوائیں اوروں سے منسوب ہوئیں

مفت میں ہم آوارہ ٹھہرے مفت میں گھر ویران ہوا

میرے حال پہ حیرت کیسی درد کے تنہا موسم میں

پتھر بھی رو پڑتے ہیں انسان تو پھر انسان ہوا

اتنی دیر میں اجڑے دل پر کتنے محشر بیت گئے

جتنی دیر میں تجھ کو پا کر کھونے کا امکان ہوا

کل تک جس کے گرد تھا رقصاں اک انبوہ ستاروں کا

آج اسی کو تنہا پا کر میں تو بہت حیران ہوا

اس کے زخم چھپا کر رکھیے خود اس شخص کی نظروں سے

اس سے کیسا شکوہ کیجے وہ تو ابھی نادان ہوا

جن اشکوں کی پھیکی لو کو ہم بے کار سمجھتے تھے

ان اشکوں سے کتنا روشن اک تاریک مکان ہوا

یوں بھی کم آمیز تھا محسنؔ وہ اس شہر کے لوگوں میں

لیکن میرے سامنے آ کر اور بھی کچھ انجان ہوا

jab se us ne shahr ko chhora har rasta sunsan hua

apna kya hai sare shahr ka ik jaisa nuqsan hua

ye dil ye aseb ki nagri maskan sochun wahmon ka

soch raha hun is nagri mein to kab se mehman hua

sahra ki munh zor hawaen auron se mansub huin

muft mein ham awara thahre muft mein ghar wiran hua

mere hal pe hairat kaisi dard ke tanha mausam mein

patthar bhi ro parte hain insan to phir insan hua

itni der mein ujre dil par kitne mahshar bit gae

jitni der mein tujh ko pa kar khone ka imkan hua

kal tak jis ke gard tha raqsan ik amboh sitaron ka

aj usi ko tanha pa kar main to bahut hairan hua

us ke zakhm chhupa kar rakhiye khud us shakhs ki nazron se

us se kaisa shikwa kije wo to abhi nadan hua

jin ashkon ki phiki lo ko ham be kar samajhte the

in ashkon se kitna raushan ik tarik makan hua

yun bhi kam amez tha mohsin wo is shahr ke logon mein

lekin mere samne a kar aur bhi kuchh anjan hua