ہر ایک شب یوں ہی دیکھیں گی سوئے در آنکھیں

ہر ایک شب یوں ہی دیکھیں گی سوئے در آنکھیں

تجھے گنوا کے نہ سوئیں گی عمر بھر آنکھیں

طلوع صبح سے پہلے ہی بجھ نہ جائیں کہیں

یہ دشت شب میں ستاروں کی ہم سفر آنکھیں

ستم یہ کم تو نہیں دل گرفتگی کے لئے

میں شہر بھر میں اکیلا ادھر ادھر آنکھیں

شمار اس کی سخاوت کا کیا کریں کہ وہ شخص

چراغ بانٹتا پھرتا ہے چھین کر آنکھیں

میں زخم زخم ہوا جب تو مجھ پہ بھید کھلا

کہ پتھروں کو سمجھتی رہیں گہر آنکھیں

میں اپنے اشک سنبھالوں گا کب تلک محسنؔ

زمانہ سنگ بکف ہے تو شیشہ گر آنکھیں

har ek shab yun hi dekhengi su-e-dar ankhen

tujhe ganwa ke na soengi umr bhar ankhen

tulu-e-subh se pahle hi bujh na jaen kahin

ye dasht-e-shab mein sitaron ki ham safar ankhen

sitam ye kam to nahin dil giraftagi ke liye

main shahr bhar mein akela idhar idhar ankhen

shumar us ki sakhawat ka kya karen ke wo shakhs

charagh bantta phirta hai chhin kar ankhen

main zakhm zakhm hua jab to mujh pe bhed khula

ke pattharon ko samajhti rahen guhar ankhen

main apne ashk sambhalunga kab talak mohsin

zamana sang bakaf hai to shisha gar ankhen