فضا کا حبس شگوفوں کو باس کیا دے گا

فضا کا حبس شگوفوں کو باس کیا دے گا

بدن دریدہ کسی کو لباس کیا دے گا

یہ دل کہ قحط انا سے غریب ٹھہرا ہے

مری زباں کو زر التماس کیا دے گا

جو دے سکا نہ پہاڑوں کو برف کی چادر

وہ میری بانجھ زمیں کو کپاس کیا دے گا

یہ شہر یوں بھی تو دہشت بھرا نگر ہے یہاں

دلوں کا شور ہوا کو ہراس کیا دے گا

وہ زخم دے کے مجھے حوصلہ بھی دیتا ہے

اب اس سے بڑھ کے طبیعت شناس کیا دے گا

جو اپنی ذات سے باہر نہ آ سکا اب تک

وہ پتھروں کو متاع حواس کیا دے گا

وہ میرے اشک بجھائے گا کس طرح محسنؔ

سمندروں کو وہ صحرا کی پیاس کیا دے گا

faza ka habs shagufon ko bas kya dega

badan darida kisi ko libas kya dega

ye dil ke qaht-e-ana se gharib thahra hai

miri zaban ko zar iltimas kya dega

jo de saka na paharon ko barf ki chadar

wo meri banjh zamin ko kapas kya dega

ye shahr yun bhi to dahshat bhara nagar hai yahan

dilon ka shor hawa ko hiras kya dega

wo zakhm de ke mujhe hausla bhi deta hai

ab is se barh ke tabiat shanas kya dega

jo apni zat se bahar na a saka ab tak

wo pattharon ko mata-e-hawas kya dega

wo mere ashk bujhaega kis tarah mohsin

samundaron ko wo sahra ki pyas kya dega