ایک پل میں زندگی بھر کی اداسی دے گیا

ایک پل میں زندگی بھر کی اداسی دے گیا

وہ جدا ہوتے ہوئے کچھ پھول باسی دے گیا

نوچ کر شاخوں کے تن سے خشک پتوں کا لباس

زرد موسم بانجھ رت کو بے لباسی دے گیا

صبح کے تارے مری پہلی دعا تیرے لیے

تو دل بے صبر کو تسکیں ذرا سی دے گیا

لوگ ملبوں میں دبے سائے بھی دفنانے لگے

زلزلہ اہل زمیں کو بد حواسی دے گیا

تند جھونکے کی رگوں میں گھول کر اپنا دھواں

اک دیا اندھی ہوا کو خود شناسی دے گیا

لے گیا محسنؔ وہ مجھ سے ابر بنتا آسماں

اس کے بدلے میں زمیں صدیوں کی پیاسی دے گیا

ek pal mein zindagi bhar ki udasi de gaya

wo juda hote hue kuchh phul basi de gaya

noch kar shakhon ke tan se khushk patton ka libas

zard mausam banjh rut ko be libasi de gaya

subh ke tare miri pahli dua tere liye

to dil-e-be sabr ko taskin zara si de gaya

log malbon mein dabe sae bhi dafnane lage

zalzala ahl-e-zamin ko bad hawasi de gaya

tund jhonke ki ragon mein ghol kar apna dhuan

ik diya andhi hawa ko khud shanasi de gaya

le gaya mohsin wo mujh se abr banta asman

us ke badle mein zamin sadiyon ki pyasi de gaya