اشک اپنا کہ تمہارا نہیں دیکھا جاتا

اشک اپنا کہ تمہارا نہیں دیکھا جاتا

ابر کی زد میں ستارا نہیں دیکھا جاتا

اپنی شہ رگ کا لہو تن میں رواں ہے جب تک

زیر خنجر کوئی پیارا نہیں دیکھا جاتا

موج در موج الجھنے کی ہوس بے معنی

ڈوبتا ہو تو سہارا نہیں دیکھا جاتا

تیرے چہرے کی کشش تھی کہ پلٹ کر دیکھا

ورنہ سورج تو دوبارہ نہیں دیکھا جاتا

آگ کی ضد پہ نہ جا پھر سے بھڑک سکتی ہے

راکھ کی تہہ میں شرارہ نہیں دیکھا جاتا

زخم آنکھوں کے بھی سہتے تھے کبھی دل والے

اب تو ابرو کا اشارا نہیں دیکھا جاتا

کیا قیامت ہے کہ دل جس کا نگر ہے محسنؔ

دل پہ اس کا بھی اجارہ نہیں دیکھا جاتا

ashk apna ke tumhara nahin dekha jata

abr ki zad mein sitara nahin dekha jata

apni shah rag ka lahu tan mein rawan hai jab tak

zer-e-khanjar koi pyara nahin dekha jata

mauj dar mauj ulajhne ki hawas be maani

dubta ho to sahara nahin dekha jata

tere chehre ki kashish thi ke palat kar dekha

warna suraj to dobara nahin dekha jata

ag ki zid pe na ja phir se bharak sakti hai

rakh ki tah mein sharara nahin dekha jata

zakhm ankhon ke bhi sahte the kabhi dil wale

ab to abru ka ishara nahin dekha jata

kya qayamat hai ke dil jis ka nagar hai mohsin

dil pe us ka bhi ijara nahin dekha jata