شکر ہے خیریت سے ہوں صاحب

شکر ہے خیریت سے ہوں صاحب

آپ سے اور کیا کہوں صاحب

اب سمجھنے لگا ہوں سود و زیاں

اب کہاں مجھ میں وہ جنوں صاحب

ذلت زیست یا شکست ضمیر

یہ سہوں میں کہ وہ سہوں صاحب

ہم تمہیں یاد کرتے رو لیتے

دو گھڑی ملتا جو سکوں صاحب

شام بھی ڈھل رہی ہے گھر بھی ہے دور

کتنی دیر اور میں رکوں صاحب

اب جھکوں گا تو ٹوٹ جاؤں گا

کیسے اب اور میں جھکوں صاحب

کچھ روایات کی گواہی پر

کتنا جرمانہ میں بھروں صاحب

shukr hai khairiyat se hun sahab

ap se aur kya kahun sahab

ab samajhne laga hun sud-o-ziyan

ab kahan mujh mein wo junun sahab

zillat-e-zist ya shikast-e-zamir

ye sahon mein ke wo sahun sahab

ham tumhen yad karte ro lete

do ghari milta jo sakun sahab

sham bhi dhal rahi hai ghar bhi hai dur

kitni der aur main rukun sahab

ab jhukunga to tut jaunga

kaise ab aur main jhukun sahab

kuchh riwayat ki gawahi par

kitna jurmana mein bharun sahab