ہر ایک شخص پریشان و در بدر سا لگے

ہر ایک شخص پریشان و در بدر سا لگے

یہ شہر مجھ کو تو یارو کوئی بھنور سا لگے

اب اس کے طرز تجاہل کو کیا کہے کوئی

وہ بے خبر تو نہیں پھر بھی بے خبر سا لگے

ہر ایک غم کو خوشی کی طرح برتنا ہے

یہ دور وہ ہے کہ جینا بھی اک ہنر سا لگے

نشاط صحبت رنداں بہت غنیمت ہے

کہ لمحہ لمحہ پر آشوب و پر خطر سا لگے

کسے خبر ہے کہ دنیا کا حشر کیا ہوگا

کبھی کبھی تو مجھے آدمی سے ڈر سا لگے

وہ تند وقت کی رو ہے کہ پاؤں ٹک نہ سکیں

ہر آدمی کوئی اکھڑا ہوا شجر سا لگے

جہان نو کے مکمل سنگار کی خاطر

صدی صدی کا زمانہ بھی مختصر سا لگے

har ek shakhs pareshan-o-dar badar sa lage

ye shahr mujh ko to yaro koi bhanwar sa lage

ab us ke tarz tajahul ko kya kahe koi

wo be khabar to nahin phir bhi be khabar sa lage

har ek gham ko khushi ki tarah baratna hai

ye daur wo hai ke jina bhi ik hunar sa lage

nishat-e-sohbat-e-rindan bahut ghanimat hai

ke lamha lamha pur ashob-o-pur khatar sa lage

kise khabar hai ke duniya ka hashr kya hoga

kabhi kabhi to mujhe admi se dar sa lage

wo tund waqt ki ro hai ke paon tuk na saken

har admi koi ukhra hua shajar sa lage

jahan-e-nau ke mukammal singar ki khatir

sadi sadi ka zamana bhi mukhtasar sa lage