بہت دل کر کے ہونٹوں کی شگفتہ تازگی دی ہے

بہت دل کر کے ہونٹوں کی شگفتہ تازگی دی ہے

چمن مانگا تھا پر اس نے بمشکل اک کلی دی ہے

مرے خلوت کدے کے رات دن یوں ہی نہیں سنورے

کسی نے دھوپ بخشی ہے کسی نے چاندنی دی ہے

نظر کو سبز میدانوں نے کیا کیا وسعتیں بخشیں

پگھلتے آبشاروں نے ہمیں دریا دلی دی ہے

محبت ناروا تقسیم کی قائل نہیں پھر بھی

مری آنکھوں کو آنسو تیرے ہونٹوں کو ہنسی دی ہے

مری آوارگی بھی اک کرشمہ ہے زمانے میں

ہر اک درویش نے مجھ کو دعائے خیر ہی دی ہے

کہاں ممکن تھا کوئی کام ہم جیسے دوانوں سے

تمہیں نے گیت لکھوائے تمہیں نے شاعری دی ہے

bahut dil kar ke honton ki shagufta tazgi di hai

chaman manga tha par us ne bamushkil ik kali di hai

mire khalwat kade ke rat din yun hi nahin sanware

kisi ne dhup bakhshi hai kisi ne chandni di hai

nazar ko sabz maidanon ne kya kya wusaten bakhshen

pighalte absharon ne hamen dariya dili di hai

mohabbat narawa taqsim ki qail nahin phir bhi

miri ankhon ko ansu tere honton ko hansi di hai

miri awargi bhi ik karishma hai zamane mein

har ik darwesh ne mujh ko dua-e-khair hi di hai

kahan mumkin tha koi kam ham jaise diwanon se

tumhen ne git likhwae tumhen ne shayari di hai