وو صنم جب سوں بسا دیدۂ حیران میں آ

وو صنم جب سوں بسا دیدۂ حیران میں آ

آتش عشق پڑی عقل کے سامان میں آ

ناز دیتا نہیں گر رخصت گل گشت چمن

اے چمن‌‌ زار حیا دل کے گلستان میں آ

عیش ہے عیش کہ اس مہ کا خیال روشن

شمع روشن کیا مجھ دل کے شبستاں میں آ

یاد آتا ہے مجھے وو دو گل باغ وفا

اشک کرتے ہیں مکاں گوشۂ دامان میں آ

موج بے تابیٔ دل اشک میں ہوئی جلوہ نما

جب بسی زلف صنم طبع پریشان میں آ

نالہ و آہ کی تفصیل نہ پوچھو مجھ سوں

دفتر درد بسا عشق کے دیوان میں آ

پنجۂ عشق نے بیتاب کیا جب سوں مجھے

چاک دل تب سوں بسا چاک گریبان میں آ

دیکھ اے اہل نظر سبزۂ خط میں لب لعل

رنگ یاقوت چھپا ہے خط ریحاں میں آ

حسن تھا پردۂ تجرید میں سب سوں آزاد

طالب عشق ہوا صورت انسان میں آ

شیخ یہاں بات تری پیش نہ جاوے ہرگز

عقل کوں چھوڑ کے مت مجلس رندان میں آ

درد منداں کو بجز درد نہیں صید مراد

اے شہ ملک جنوں غم کے بیابان میں آ

حاکم وقت ہے تجھ گھر میں رقیب بد خو

دیو مختار ہوا ملک سلیمان میں آ

چشمۂ آب بقا جگ میں کیا ہے حاصل

یوسف حسن ترے چاہ زنخدان میں آ

جگ کے خوباں کا نمک ہو کے نمک پروردہ

چھپ رہا آ کے ترے لب کے نمک دان میں آ

بس کہ مجھ حال سوں ہمسر ہے پریشانی میں

درد کہتی ہے مرا زلف ترے کان میں آ

غم سوں تیرے ہے ترحم کا محل حال ولیؔ

ظلم کو چھوڑ سجن شیوۂ احسان میں آ

wo sanam jab sun basa dida-e-hairan mein a

atish-e-ishq pari aql ke saman mein a

naz deta nahin gar rukhsat-e-gul gasht-e-chaman

ai chaman zar haya dil ke gulistan mein a

aish hai aish ke us mah ka khayal-e-raushan

sham-e-raushan kiya mujh dil ke shabistan mein a

yad ata hai mujhe wo do gul-e-bagh-e-wafa

ashk karte hain makan gosha-e-daman mein a

mauj-e-be tabi-e-dil ashk mein hui jalwa numa

jab basi zulf-e-sanam tab-e-pareshan mein a

nala-o-ah ki tafsil na puchho mujh sun

daftar-e-dard basa ishq ke diwan mein a

panja-e-ishq ne betab kiya jab sun mujhe

chak-e-dil tab sun basa chak-e-gareban mein a

dekh ai ahl-e-nazar sabza-e-khat mein lab-e-laal

rang-e-yaqut chhupa hai khat-e-raihan mein a

husn tha parda-e-tajrid mein sab sun azad

talib-e-ishq hua surat-e-insan mein a

shaikh yahan bat tiri pesh na jawe hargiz

aql kun chhor ke mat majlis-e-rindan mein a

dard mandan ko bajuz dard nahin said-e-murad

ai shah-e-mulk-e-junun gham ke bayaban mein a

hakim-e-waqt hai tujh ghar mein raqib-e-bad khu

dew-e-mukhtar hua mulk sulaiman mein a

chashma-e-ab-e-baqa jag mein kya hai hasil

yusuf-e-husn tire chah-e-zanakhdan mein a

jag ke khuban ka namak ho ke namak parwarda

chhup raha a ke tire lab ke namak dan mein a

bas ke mujh hal sun hamsar hai pareshani mein

dard kahti hai mira zulf tire kan mein a

gham sun tere hai tarahhum ka mahal hal wali

zulm ko chhor sajan shewa-e-ehsan mein a