رچے بسے ہوئے لمحوں سے جب حساب ہوا

رچے بسے ہوئے لمحوں سے جب حساب ہوا

گئے دنوں کی رتوں کا زیاں ثواب ہوا

گزر گیا تو پس موج بے کناری تھی

ٹھہر گیا تو وہ دریا مجھے سراب ہوا

سپردگی کے تقاضے کہاں کہاں سے پڑھوں

ہنر کے باب میں پیکر ترا کتاب ہوا

ہر آرزو مری آنکھوں کی روشنی ٹھہری

چراغ سوچ میں گم ہیں یہ کیا عذاب ہوا

کچھ اجنبی سے لگے آشنا دریچے بھی

کرن کرن جو اجالوں کا احتساب ہوا

وہ یخ مزاج رہا فاصلوں کے رشتوں سے

مگر گلے سے لگایا تو آب آب ہوا

وہ پیڑ جس کے تلے روح گنگناتی تھی

اسی کی چھاؤں سے اب مجھ کو اجتناب ہوا

ان آندھیوں میں کسے مہلت قیام یہاں

کہ ایک خیمۂ جاں تھا سو بے طناب ہوا

صلیب سنگ ہو یا پیرہن کے رنگ نصیرؔ

ہمارے نام سے کیا کیا نہ انتساب ہوا

rache base hue lamhon se jab hisab hua

gae dinon ki ruton ka ziyan sawab hua

guzar gaya to pas mauj-e-be kinari thi

thahar gaya to wo dariya mujhe sarab hua

supurdagi ke taqaze kahan kahan se parhun

hunar ke bab mein paikar tira kitab hua

har arzu miri ankhon ki raushni thahri

charagh soch mein gum hain ye kya azab hua

kuchh ajnabi se lage ashna dariche bhi

kiran kiran jo ujalon ka ehtisab hua

wo yakh mizaj raha faslon ke rishton se

magar gale se lagaya to ab ab hua

wo per jis ke tale ruh gungunati thi

usi ki chhaon se ab mujh ko ijtinab hua

in andhiyon mein kise mohlat-e-qayam yahan

ke ek khema-e-jan tha so be tanab hua

salib-e-sang ho ya pairahan ke rang nasir

hamare nam se kya kya na intisab hua